DIS HOE DIT NOU IS...

Deesdae sien mense my meer gereeld in die rystoel en dan ‘skrik’ hulle wanner ek opstaan en met die ‘walker’ stap, en kan nie verstaan dat ek my bene kan beweeg nie. Ek wil net ‘n misverstand uit die weg ruim. Ek is nie verlam nie, maar ek kan nie loop nie. Nie eens een treetjie sonder die ‘walker’ nie.


HOE WERK DIT? In die geval van ‘n spinalekoordbesering, soos ‘n parapleeg of kwadrupleeg, is dit soos ‘n drukker (die spiere van die bene en die arms) wat aan ‘n rekenaar (die brein) gekoppel is, maar die draad (die spinalekoord/senuwees) tussen die drukker en die rekenaar is afgeknip, dus kan die rekenaar nie meer met die drukker kommunikeer nie. Die rekenaar is egter nog in ‘n perfekte, werkende toestand. In die geval van neurologiese siektes, soos MSA, is daar egter ‘n problem met die hardeskyf van die rekenaar en het die brein van sy funksies verloor om boodskappe na die spiere te stuur. Maar nie al die kommunikasie is afgesny soos met ‘n verlamming nie. Die medikasie (dopamine) wat ek neem help ook in ‘n mate om hierdie kommunikasie aan die gang te hou.


HOE VOEL DIT? Daar is ‘n effense dooie gevoel in my linkervoet en enkel en prikkels vanaf my heup tot by my voet. Die spiere in my linkervoet werk nie meer goed nie en gevolglik is my tone wyd uitmekaar en die voetbrug het gesak.


WAT KAN EK NIE DOEN NIE? Ek het ‘n totale verlies van balans en moet uiters versigtig wees om nie te val nie.


HOE AFFEKTEER HIERDIE VERLIES AAN BALANS MY? Ek kan glad nie loop sonder om aan iets vas te hou nie. Kan nie nie langer as ‘n paar sekondes staan nie. Omdraai of van rigting verander is die moeilikste beweging om uit te voer. Al hierdie simptome maak dit baie moeilik en gevaarlik om bv kos te kook, want in ‘n kombuis draai ‘n mens gedurig tussen die stoof, die toonbank en die yskas. Om ‘n bak of pot met twee hande op te tel is onmoontlik, want ek moet altyd met een hand aan iets vashou. Badkamers is gevaarlike, gladde plekke. Oor ‘n bad se rant kan ek lankal nie klim nie. My nuwe badkamer het ‘n inrolstort (geen muurtjie om oor te klim nie) en vir veiligheid gebruik ek ‘n stortrystoel. Tuinwerk is onmoontlik. Die ongelyke oppervlaktes buite maak dit gevaarlik en om ‘n tuinslang te gebruik is onmoontlik.


HET EK PYN? Omdat ek mank loop affekteer dit my rug en heup en ek neem nou en dan pynpille, anti-inflammatoriese pille en gaan vir fisioterapie.

WAAROM KAN EK NIE MOTOR BESTUUR NIE? Ek kan, maar ek mag nie omdat my reaksie tyd aangetas is. Enige stres het ‘n onmiddellike fisiese effek op my. Ek ‘vries’, begin bewe en dan kan ek glad nie beweeg nie. Nie ‘n goeie ding vir mede padgebruikers nie!


Hoe minder ek beweeg, hoe moeiliker raak dit om te beweeg. Wanneer ‘n lang tyd in die rystoel gesit het, is dit moeiliker om op te staan en met die ‘walker’ te loop. Daarom is my oefenprogram ook ‘n essensiële deel van my terapie. “If you don’t use it, you lose it”!

DIS HOE DIT NOU IS....., maar is julle vra hoe gaan dit, is die antwoord; “goed dankie”. Met die hulp van baie mense en genade van Bo, kry ons dit reg om aan te gaan met ons lewens.